AXUDAS Á PROMOCIÓN DE EMPREGO AUTÓNOMO E CONTRATACIÓN INDEFINIDA DE PERSOAS ASALARIADAS

A Consellería de Economía, Emprego e Industria publica no DOG nº 19 do día 26/01/2018 as axudas á promoción de emprego autónomo e contratación indefinida de persoas asalariadas, tanto no Programa I como no Programa II, para o ano 2018.

 

Programa I: axudas á promoción do emprego autónomo

Este programa ten por obxecto a concesión dunha axuda económica a aquelas persoas desempregadas que pretendan desenvolver a súa actividade empresarial ou profesional en Galicia como traballadoras autónomas ou por conta propia, para facer fronte aos distintos gastos xerados no comezo da súa actividade laboral.

Persoas beneficiarias: Serán beneficiarias aquelas persoas que causen alta no réxime especial de autónomos ou en calquera outro réxime especial por conta propia da Seguridade Social ou en mutualidade de colexio profesional, entre o 1 de outubro de 2017 e o 30 de setembro de 2018, ambos inclusive, como titulares ou cotitulares do negocio ou explotación.

Prazo xeral de presentación de solicitudes para o Programa I: finalizará o 30 de setembro de 2018.

 

Programa II:  axudas a persoas traballadoras autónomas pola contratación indefinida de persoas asalariadas

Este programa ten por obxecto fixar as bases reguladoras e convocar, para o ano 2018, os incentivos á contratación indefinida inicial de persoas desempregadas realizadas por persoas traballadoras autónomas ou persoas profesionais con domicilio social e fiscal en Galicia.

Persoas beneficiarias: Poderán ser beneficiarias das axudas previstas nesta orde as persoas traballadoras autónomas ou as persoas profesionais pola primeira contratación que realicen con carácter indefinido durante o seu primeiro ano de actividade e pola segunda e terceira contratación que realicen con carácter indefinido nos tres primeiros anos de actividade.

Prazo de presentación de solicitudes:

a) As solicitudes de axudas polas contratacións subvencionables realizadas entre o 1 de outubro de 2017 e a data da publicación desta orde deberanse presentar no prazo de dous meses contado desde o día seguinte ao da publicación da orde. Entenderase como último día de prazo o correspondente ao mesmo ordinal do día da publicación e, se no mes de vencemento non hai día equivalente ao inicial do cómputo, entenderase que o prazo remata o último día do mes.

b) As axudas previstas polas contratacións subvencionables realizadas desde a entrada en vigor desta orde deberanse solicitar ata o último día do segundo mes seguinte á data en que se inicie a relación laboral indefinida pola cal se solicita subvención. Se o último día de prazo é inhábil, entenderase prorrogado ao primeiro día hábil seguinte.

c) O prazo para a presentación das solicitudes de axudas rematará o 30 de setembro de 2018, aínda que nesa data non transcorrese o prazo sinalado no parágrafo anterior.

 

PODE CONSULTAR AS BASES ÍNTEGRAS DAS CONVOCATORIAS PREMENDO AQUÍ.

Check Also

CONVOCATORIA DE SUBVENCIÓNS PARA A REHABILITACIÓN DO CASCO HISTÓRICO DE RIBADAVIA E SAN CRISTOVO

A xunta de goberno local do concello de Ribadavia en sesión de 3 de decembro …