O RIBEIRO ORGANIZARÁ ACTIVIDADES DENTRO DA ENBHIGA 2019

• O Concello de Ribadavia, o Consello Regulador e a Ruta do Viño do Ribeiro colaborarán nesta acción de promoción da provincia.

• Así o acordaron esta mañá nunha reunión das tres entidades coa Asociación Cociña Ourense, impulsora do evento.

Esta mañá celebrouse unha reunión entre o presidente da Asociación Cociña Ourense, Miguel González, o alcalde de Ribadavia, César Fernández, e Juan M. Casares, presidente do Consello Regulador e da Ruta do Viño do Ribeiro.
Durante este encontro as catro entidades acordaron a súa colaboración no desenvolvemento da vindeira edición do Encontro Biceoceánico-Hispano de Gastronomía (ENBHIGA 2019) que desta forma terá algunha actividade na vila de Ribadavia como centro e corazón da comarca vitivinícola do Ribeiro. As accións a desenvolver concretaranse nos vindeiros días pero, segundo adiantaron, tentarán amosar aos participantes o potencial termal e cultural da comarca como complemento necesario a un territorio eminentemente vitivinícola.

Segundo César Fernández, alcalde de Ribadavia, “O Ribeiro non podía ficar á marxe dun evento que pode contribuír a darlle á vila de Ribadavia unha maior visibilidade dende o punto de vista turístico e enogastronómico.”

Para Juan M. Casares, “a riqueza non só enolóxica senón tamén histórica, patrimonial e cultural do Ribeiro precisa que se poña en valor de xeito continuo e esta é unha oportunidade inmellorable.”

Miguel González, presidente da Asociación Cociña Ourense, expuxo que “este evento é un espazo para o encontro e intercambio profesionais do turismo gastronómico das dúas orelas do océano. Ten demostrado o seu gran potencial como ferramenta dinamizadora do sector por iso entende que unha comarca senlleira como o Ribeiro debía ter unha representación.”

ENBHIGA 2019
O Encontro Bioceánico-Hispano de Gastronomía, (Enbhiga 2019) celebrarase entre os días 14 e 19 de outubro na provincia de Ourense. Este evento que naceu en 2015 na Arxentina chega por vez primeira a Europa para reunir a cociñeiros, touroperadores e medios de comunicación especializados de todo o mundo, co gallo de coñecer de primeira man os atractivos turísticos das distintas comarcas da provincia.

Compartir

Check Also

RIBADAVIA CELEBRARÁ O DÍA DO LIBRO DURANTE TODA A SEMANA CON DESCONTOS NAS SÚAS LIBRARÍAS.

A semana que ven en Ribadavia celebramos A SEMANA DO LIBRO, do 19 ao 25 …